بسم الله الرحمن الرحيم
كيف الحال والاخبار والاحوال !؟
حبيت اغير نمط اسلوبي في كتابه القصص وبحتسي قصيمي لانني من اهلها
اغديكم تفهمون حتسي ازين !!
اليوم الله يخليني للمدونه والي يقرائون المدونه والي يحبوني يعني 😂😂
كنت احوس في شوارع الرياض ماخليت حي ماطبيته كنت افحط في الحواري ادور معهد الاريبه للتدريب أحسبهم عندهم لغات وتسذا طلع مشوار على الفاضي !! همن طلعت من حي البديعه بعد الدوام ادور معهد ادرس فيه الماني تخبرون الحلم مسيطر علي ولا شئ تحقق من احلامي !!
وان تسان مصملين تعرفون حلمي بقول لكم انني احلم اني ادرس ماجستير في المانيا 😳 لحد يقول ماتجي !!
كل شئ بالدنيا جائز !!
ولأنني من سكان منطقه الرياز القميله وتعلمت خارج منطقه الرياض #واشطح ياحريملاء
قررت اني ادرس في المانيا واكون بحق ام بطوطه !! وعلشان بنتي الدلوعه الي مابعد جت تفتخر بقصه امها القميله 😍
المهم بعد فرفره طويله ودوخه الشوارع وقفنا عند اشاره مرور وتعرفون يعني ايش اشارات مرور وزحمه !؟ يالاااااهوي
كانت على يدي اليمين سياره اودي لونها اسود ولوحتها احب طبعا شفت اللوحه بعد ماتعدتنا السياره هههه وعلى يدي اليسار كانت ددسن غماره فيها شايب نفسي اقبص خدوده لانني احب الكبار بالسن ( لحد يروح تفكيره لبعيد )!!!!
وكانت جنب الشايب بنت وانا شفت الركاب بعد ماتعدونا يعني ماقزيت وهيك 👀
المهم فجاني شهريار والهام القصص والشمس صاكه عيوني ونسجت قصه جميله اتمنئ تعجبكم
الشايب ابو عبد الرحمن له بنت وحيده اسمها ياسمين وامها متوفيه وهي الوحيده الي تعيل ابوها لانه ماله غيرها من البنات والاولاد !!
ياسمين تخرجت من الجامعه بنسبه كويسه معدلها جيد وكعاده الخريجين والخريجات يسجلون في hafiz.gov.sa
سجلت معهم ياسمين وصارت تستلم الفين شهريا وساعدت ابوها كثير في مرضه وجاء يوم من الايام ولقى لها حافز وظيفه قالت لبيها يايبه الله لا يخليني منك حافز لقوا لي وظيفه وقال ابوها بكل سعاده الله يبشرك يابنتي الهمام نقدم عليهم ( الهمام تعني هيا بنا ) لمن لا يعرفها !!
وجهزت ياسمين وهي فرحانه الملف الاخضر والاوراق علشان التقديم وراحت هي وابوها للمكان الي طالبينها فيه ولكن قدر الله وماشاء فعل صدمهم شاب أسمر شعره مفلفل راكب سياره اودي لونها اسود موديل 2013 ولوحه سيارته أحب 😁 ان تسان صاحب السياره يقراء ترا احب اقول لك قصه عبيطه من راسي مب صدز توهقني !!
كان متأثر من الحادث ولانه دلوع وكيوت ماعمره اذى احد في حياته والحمد لله كلهم ماصابهم شئ الا صاحب الددسن كانت سيارته شبه مندمره وبالاحرى ماصارت تشتغل !!
حس الشاب الاسمر انه اخطاء بحقهم لانه هو الغلطان ولأن الشايب قال له روح ياولدي والعوض من الله قام الشاب يتميلح وقال له والله لأدفع تكاليف خرابها فأنبسط الشايب وقال له جزاك الله خير لكن الشاب الاسمر ماوقف على كذا لأن عيونه على ياسمين يستعرض عندها أخذ الشايب والبنت في سيارته ووداهم للمعارض 😁
وقال لهم يختارون سياره تناسب لهم 😳
حلف الشايب والله مايصير والولد صامل مايطلعون الاوالسياره راكبينها !!
وبالاخير هدى ربي الشايب واشترى له الشاب جيب وطبعا دفع كل تكاليفها هذا الشاب الاسمر والبنت بينهم طارت مع الغبار هههه
ومرت الايام والولد يكلمهم ويجيهم وصارت علاقات دبلوماسيه مابين العائلتين الا ان تقدم لها هذا الشاب وخطبها ووافقت المطيوره وتزوجوا وجابت بنت تشبه ابوها الاسمر
وانتهت الحكايه الخرافيه وعاشوا بسلام يذكر
ليست هناك تعليقات:
إرسال تعليق